Коррупсия – жамият ривожига тўсиқ

Коррупсия – жамият ривожига тўсиқ

Санитария-эпидемиологик осойишталик ва жамоат саломатлиги соҳасида кадрларни қайта тайёрлаш ва уларнинг малакасини ошириш марказида “Коррупсия – жамият ривожига тўсиқ” мавзусида тадбир ўтказилди.

Унда Санитария-эпидемиологик осойишталик ва жамоат саломатлиги соҳасида кадрларни қайта тайёрлаш ва уларнинг малакасини ошириш маркази раҳбарияти, ходимлар, курсантлар иштирок этди.

Бугунги куннинг долзарб мавзусига бағишланган тадбирни Санитария-эпидемиологик осойишталик ва жамоат саломатлиги соҳасида кадрларни қайта тайёрлаш ва уларнинг малакасини ошириш маркази директори Ў.Шукуров очиб, коррупсия мамлакатнинг юксалиши ва тараққий этишига жиддий тўсиқлиги, иллатга қарши курашиш барча давлатларда энг долзарб масала бўлиб қолаётганини таъкидлаб ўтди.

Тадбирда сўзга чиққан “Ўзбекистонда очиқлик ва шаффофлик” таҳлил маркази директори ўринбосари, иқтисод фанлар номзоди Нодира Зикриллайева сўнгги йилларда мамлакатимизда ҳам коррупсияга қарши курашиш масаласи давлат сиёсати даражасига кўтарилиб, коррупсияга имкон берувчи сабаблар ва шарт-шароитларни бартараф этиш, коррупсияга оид ҳуқуқбузарликларни ўз вақтида аниқлаш ва уларга чек қўйиш бўйича салмоқли ишлар қилинганига тўхталди.

Хусусан, мамлакатимизда коррупсияга қарши курашишнинг самарали механизми яратилди, қонунийликни таъминлашнинг институционал ва ҳуқуқий асослари шакллантирилди. Коррупсияга қарши курашиш бўйича норматив ҳуқуқий асосларни такомиллаштириш, ҳуқуқий бўшлиқларни бартараф этиш мақсадида соҳага тааллуқли, бошқа соҳалардаги ислоҳотлар натижасида коррупсия омилларини қисқартиришга қаратилган норматив-ҳуқуқий ҳужжатлар қабул қилинди.

Шунингдек, коррупсияга қарши курашиш бўйича давлат сиёсати коррупсиянинг оқибатлари билан курашиш эмас, балки унинг олдини олишга қаратилган превентив чора-тадбирлар амалга ошириляпти. Давлат бошқарувида бюрократияни камайтириш, очиқлик ва шаффофликни таъминлаш, давлат хизматларини кўрсатиш сифатини яхшилаш, рақамлаштиришга қаратилган ишлар шулар жумласига киради.

Коррупсиянинг жамият тараққиётига салбий таъсири ва унинг оқибатлари, коррупсия ва жиноий жавобгарлик, шунингдек, уни олдини олишда ҳар бир фуқаронинг масъулияти, манфаатлар тўқнашуви каби мавзуларга алоҳида тўхталиб ўтилган тадбирда кўплаб мисоллар келтириб ўтилди.

Тадбирда иштирок этган мутахассис давлат органлари ва жамоат ташкилотлари ушбу муаммони ҳал қилиш учун биргаликда иш олиб бориш, ахлоқий ва ҳуқуқий саводхонликни оширишга аҳамият бериш кераклигини таъкидлади.

Бу каби тадбирлар фуқароларнинг ҳуқуқий онги ва ахлоқий қадриятларини ривожлантириш, коррупсияга қарши курашишдаги фаоллигини оширишга хизмат қилади.